MIZORAM-A BADMINTON TIHHMASAWNNA TUR SAWI HO

23^rd January, 2018

Vawiin ni 23.1.18 chawhnu dar 2 khan Mizorama Badminton tihhmasawnna tur leh Grassroot Training din dantur Mizoram Badminton Association leh TATA Education & Development Trust te chuan sawihona hun an nei.

He hunah hian Mizoram Badminton tihhmasawnna atana thawhnona tur Memoradum of Understanding (MoU) duan te thlir ho niin, sawihona hun hman a ni a. Siamthat ngai leh belh leh paih ngai lai te sawihona hun neih a ni. Ruahman lawkna ang chuan he thawhhonaah hi kum 2018 atanga tan tur niin hemi atana sum mamawh leh budget siam tawh chu TATA Trusts lam hian an pawm tawh a. Hmalakna hmasa tur ah hian Mizoram chhung district paruk – Aizawl, Lunglei, Serchhip, Champhai, Mamit leh Kolasib te tuam tur a ni dawn a, heng district hrang hrang atan hian hmun 40 ah Grassroot Development Programme tan tur a ni ang a, heng Programme hrang hranga thiam bik leh talent nei tha te thlakhawm awmna tur Regional Development Centre paruk din tur a ni bawk. Heng Regional Centre ah hian facilities changkang leh changtlung zawk dah tum a ni bawk.

Heng bakah hian High Altitude Development Centre (HADC) pakhat din tum a ni bawk a, hemi atana tul leh pawimawh leh hmalakdan tur te pawh sawi ho a ni bawk. He HADC hi kum 3 chhunga zawh hman tura ruahman niin khawvel huapa Training Centre tha tlukpui tura ruahman a. He HADC hi Training Centre mai nilova National Level Tournament buatsaih theihna tura duan a ni bawk.

He thawhhonaah hian TATA Trusts leh MBA bakah Pullela Gopichand Badminton Academy (PGBA) leh Mizoram State Sports Council (MSSC) te tel tura ruahman a ni bawk. He thawhhona atan leh hmalakna atan hian TATA Trusts lam hian kum thum chhung atan 20 Crs. an pawm tawh bawk.

He meeting ah hian TATA Trusts aiawhin Mr. Aman Sharma, Manager Programme – Sports, Mr. Raj Barath KB, Tata Administrative Service leh B. Lalrinkima, Regional Manager, Mizoram te an tel a, MBA aiawh hian OB leh Executive member enge maw zah an tel a ni.