MBL III League Stage Report

21^st November, 2017

DAY 2 Report

3rd Hrangbana Memorial Mizoram Badminton League ni hnihna chu khelh chhunzawm niin Pool B lamin khelin Tie hmasa ah Southern Acers Siaha leh Ralte Villa BC Champhai te in hmachhawnin Tie hnung zawkah Chanmari Evening Stars leh Mission Veng te an in tum bawk.

Tie hmasaa in tum Siaha leh Champhai ah hian Siaha lamin Mens Doubles, Mixed Doubles, Mens Singles 2 leh U19 Boys Singles ah te chakin Champhai lam hian Mens Singles 1 la ve in Siaha lam hian 4 – 1 in chakna an chang a ni. Game a hmuhnawm a, Match hmasaber ah Siaha lamin Akshit Mahajan leh M. Joseph hmangin chakna an chang a, XD ah Mahajan rawn lut leh in Junior player Lalvenhimi’n rawn luhpuiin chakna an rawn chang leh a, Venhimi a khel tha a, Match khat chauh khel mahse, a game a hmuhnawmin duhthusam game a khel chhuak a, Player of the Tie atana thlan a ni bawk. MS2 ah M. Joseph rawn lutin Rindika lakah point rawn thawk chhuak lehin U19 Boys Singles ah Nunhluan Siaha chakna nemnghet turin chakna a rawn chang leh a, MS1 ah erawh Champhai lamin an chhuan tawlawl Daniel S Farid hmangin point rawn thawk chhuakin Siaha lamin 4-1 in Champhai an hneh a ni.

Tie hnung zawkah Match hmasaber khelin Pratul Joshi leh Lalmama hmangin Mission Veng lamin point an thawk chhuak a, Aisom Singh leh Lalrinzuali ten Chanmari tan point an rawn thawk chhuak veleh. MS2 lut lehin Mission Veng tan Zarkima rawn chak lehin U19 Boys Singles ah Aison Singh in Chanmari rawn chhan velehin 2-2 in an im draw. MS1 khelh chhunzawm leh niin Chanmari tan Ismael leh Mission Veng ran Pratul ten an rawn khel a, game a hmuhnawm a, Tie a zawh meuh chuan Mission Veng lamin 3-2 in chakna an chang ta a ni. Tie hnungzawka khel tha tak leh Chanmari tana point 2 thawkchhuak tu Aimson Singh chu Player of the Tie atana thlan a ni bawk.

DAY 3 Report

MBL zanthumna khelh chhunzawm a ni a, Tuikual Shuttlers leh Brig.& Mrs. T. Sailo KANAN ten khel in Tuikual lamin an dinhmun sawhngheh nan 3-2 in chakna an chang.

Game hmasaber ah U19 Boys Singles a bul tan niin, Tuikual tan Muanawma a rawn lut a, Kanan tan Dindina a rawn lut bawk a, Dindina hian game hmahruai chan mahse, rawnin siamtha in final game ah chakna changin Kanan tan point a rawn thawkchhuak a. Mens Singles 1 khelh chhunzawm niin Prajapati leh Jaiswal te in tumin Tuikual tan Prajapati in point a rawn thawk chhuak ve thung. Mixed Doubles khelh leh niin Kanan tan Eddie leh Akimi ten awlsam tein Thlamuanpuia leh Zamzami lakah point an thawkchhuak veleh bawk. Mens Singles 2 khelh chhunzawm niin Abelan Kanan ai rawn awhin Samua Tuikual tan rawn penchhuak ve thung. Abelan game hmahruai la mahse, senior player leh ranking sang zawk Samua rawn insiam tha in second game a la ve leh a, final game ah tawn hriat nghah zawk Samua an game a thunun chhunzawm a, chakna changin Tuikual tan point a rawn hmu leh bawk. Team pahnihte 2-2 in an in draw a, deciding factor atan Mens Doubles ah Tuikual tan Prajapati leh Samua an rawn lut a, Kanan tan Jaiswal leh Abela an rawn lut ve bawk. Tuikual lamin a tir atangin game ah an chungnung zawk a, a tawp thlenga chungnung zawkin chakna changin Tuikual chuan point 3 an hmu ta a ni. Kanan lam hian an state pawn player an la chhawr fuh hleithei lo a, Tie hnih khelh tawh ah an state pawn player hian point 1 chauh a la thawk chhuak a, Tie khat khelh tur an neih ah hian Kanan tan theihtawp a chhuah a ngaih tawh hmel. He Tie a Tuikual Shuttlers tana point 2 thawkchhuak tu Samuel Lalnunmawia chu Player of the Tie a thlan a ni bawk.

Day 4 Report

MBL 3 khelh chhunzawm zel niin Zan 4-na ah Tie hnih awmin Zotlang Rockets leh Southern Acer Siaha ten chakna an chang.

Tie hmasa zawkah hian Zotlang Acers leh Hlimen Shuttlers te intumin, Mixed Doubles, Men Singles 2 leh U19 Boys Singles ah te Zotlang lamin chakna an chang a, Mens Singles 1 leh Mens Doubles ah te Hlimen lam chak mahse, Zotlang lamin 3-2 in Tie an la a ni. He Tie ah hian Hlimen Shuttlers tana point 2 thawkchhuaktu leh MBA Player Senior Lalmuanawma chu Player of the Tie ah thlan a ni. Ti hian Pool A ah Zotlang leh Tuikual ten point 6 ve ve hmuin hma an hruai a, Kanan leh Hlimen te hian point 4 ve ve hmuin hnung an dawl thung a ni.

Tie hnung zawk ah Pool B lam tangin Southern Acers Siaha leh Chanmari Evening Stars ten an khel ve leh a. Siaha lam hian an state pawn player Akshit Mahajan hmangin Match hmasa pahnih Mixed Doubles leh Mens Singles 1 rawn la nghalin, Mens Singles 2 ah pawh Siaha tan M. Joseph chuan point a rawn thawk chhuak leh a ni. Mens Doubles ah erawh Chanmari lamin chakna an chang a, Under 19 ah pawh mizo junior in Chanmari state pawn player a hneh lo bawk a, Tie zawh meuh chuan Siaha lamin 3-2 in Tie chakna an chang ta a ni. He Tie-a Siaha tana a zawna point hnih thawk chhuak thei Akshit Mahajan chu Player of the Tie ah thlan a ni leh bawk.

Day 5 Report

MBL Day 5 chu Electric YMA Hall-ah khelh chhunzawm niin Dt. 17.11.17 hian Tie 2 a awm a, Tie hmasaah Pool B lam khelin Tie hnuhnungah Pool A an khel thung.

Tie hmasa hian Ralte Villa BC Champhai leh Mission Veng i tumin, Mission veng lam hian an dinhmun sawh nghetin Champhai lakah Point 4 an thawkchhuak. He tie ah hian Champhai lam chhuanvawr Daniel S Farid chuan Point hmahruai rawn thawk chhuak mahse, a team-mate ten a point hmuh rawn chhunzawm theih loin, MD, XD, MS2 leh Junior Boys Singles ah te Mission Veng hian chakna an rawn chang ta vek a ni. He Tie-a Mission Veng tana Junior Boys Singles kheltu K. Lalmalsawma chu Player of the Tie ah thlan a ni bawk.

Tie hnung zawkah Brig. & Mrs. T. Sailo leh Hlimen Shuttlers te intum in an ni hi an pool ah bottom ve ve an ni a, match hmasa berah State pawn players ve ve intumin Kanan lamin chakna chang mahse, MD ah leh XD ah Hlimen lam an rawn che tha ve leh, MS2 khelh leh niin Kanan lamin chakna an chang leh a, match hnung berah Junior Boys Singles khelh leh niin Dindina leh Jojoa ten an khel a, game hmasa lamah Dindina che tha viau mahse, experience nei tha zawk Jojoa rawn insiam tha in, final game ah chakna a rawn chang a, Hlimen tan point a rawn thawk chhuak leh bawk a ni. Hlimen tana Junior Boys Singles khel Joseph VL Ringngheta a khel tah a, a game a hmuhnawm bawk a, Player of the Tie ah thlan a ni bawk.

Ti hian Pool A lam dinhmun chu chiang tluka ngaih theih a ni a, Hlimen lamin point 7 hmu tawh mahse, Zotlang leh Tuikual inkhel tur ah hian Solid point hmu zawk an awm loh chuan Hlimen tan chance a awm tawh lo thung. Pool B lamah pawh Mission veng leh Siaha ten Point 7 ve ve an hmu tawh a, an ni hi lut tura ngaih theih a ni tawh bawk a, mahse, game a nih angin sawi lawk theih a ni lo thung. MBL hi ni 24 ah final khelh tura ruahman a ni.

Day 6 Report

MBL khelhchhunzawm zel a ni a, Dt. 18.11.17 zan khan Pool A lam atanga Semi Final lut tura rin kai pahnih Zotlang Rockets leh Tuikual Shuttlers ten an khel a, Zotlang lamin chakna changin Pool Champion nihna an chang a, Tuikual lam erawh chak lo mahse, Pool Runners up niin Semi Final an lut ta tho.

Hemi te inkhel ah hian Mens Doubles in bul tan a ni a, Tuikual tan Samua leh Prajapati ten chakna an chang a, Prajapati hi Mens Singles ah lut lehnghalin Tuikual tan bawk point a rawn thawkchhuak leh, Tuikual tan beisei a lian tan viau a, Mixed Doubles khelh leh a ni a, mizo partner tha Hriati leh BSa ten Zotlang tan beiseina rawn siamin, chakna an rawn chang ve thung. Mens Singles 2 luh leh niin Tuikual tan Samua leh Zotlang tan Kiran B te an in hmachhawn. Game hmahruaiah Samua che tha hle a, Game hnihnaah Kiran B rawn insiam tha in, game thunun viau lo mahse vanneih vang erawh a tih theih ang, game a rawn la ve leh. Final game khelh a nih meuh chuan state pawn player in game thunun zelin chakna a chang ta a ni. He Match ah hian umpire decision ah buai deuh awm mahse official lamin an thunun thei a, mahse player lam tan erawh rilru a ti hnual deuh em a tih theih. Tie ah 2-2 in an in draw. Deciding factor atan Junior Boys Singles luh leh niin Kiran B a rawn lut leh nghal, Tuikual tan Muanawma a rawn lut leh bawk. He match ah hian deciding khelh niin Kiran B zawkin Zotlang tan point rawn thawkchhuak lehin Zotlang lamin chakna changin Pool champion an ni ta a ni. He Tie-a deciding game vawihnih khel leh chakna chang ve ve leh Zotlang tana Pool Champion nihna point thawkchhuak tu Kiran B chu Player of the Tie atana thlan a ni bawk.

Dt. 20.11.17 hian Pool B lam dinhmun ti chiang turin Tie khelh leh a ni dawn a. Tie hmasa ah chakna la chang lo ve ve Chanmari Evening Stars leh Ralte Villa BC Champhai te an in tum ang a, Tie hnung zawkah point 7 ve ve hmu tawh Southern Acers Siaha leh Mission Veng ten Pool champion nih an inchuh ve thung bawk ang.

Day 7 Report

MBL chuan a hun hnung a thleng tan mek a, dt. 20.11.17 zan khan League Stage vawrtawp khelh a ni a, Tie hmasaah beisei nei mumal tawh lo ve ve Ralte Villa BC Champhai leh Chanmari Evening Stars ten khelin Tie hnungah Pool B Champioj nih inchuh in SouthernAcers Siaha leh Mission Veng ten a khel thung.

Tie hmasa ah hian chak la nei lo ve ve inkhelin Champhai lamin Point 2 an nei a, Chanmari lamin point 4 an nei thung. Chanmari lam hian solid point hmu pawh nise, lehlam intumah an in nghat tho a ni. Match tan a ni a, MS1 in bul tan a ni a, Champhai lam tan Daniel in point a rawn thawkchhuak nghal a, U19 ah erawh Aimson Singh hmangin Chanmari lam in chakna a rawn nei ve leh. Chanmari lamin an dinhmun rawn siam tha chhunzawmin MD leh XD an rawn la chhunzawm. Match tawp berah MS2 ah Champhai tan Lalrindika chuan point rawn hmu veleh in Chanmari lam hian 3-2 in chak mahse Semi Final an in hlangkai zo ta lo a ni. He Tie ah hian Chanmari tana point 2 thawk chhuaktu Ismael Azyu chu Player of the Tie atana thlan a ni.

Tie hnung zawkah Pool B Champion in chuhin Siaha leh Mission Veng lam an rawn lut leh. Game hmahruaiah Mission Veng lam state pawn player Joshi chuan point a rawn thawkchhuak nghal a, U19 khelh chhunzawm leh niin Lalnunhlua a la chungnung reng a, Siaha tan point a rawn thawkchhuak ve thung. MD khelh leh niin Mission Veng in an state pawn player an chhawr tangkai nawn a, a partner Lalmama nen point an thawk chhuak leh a, Mission veng tan beiseina an rawn siam. XD khelh chhunzawm niin Siaha tan a tir atanga la in partner char char leh la chak char char Mahajan leh Venhimi an rawn lut a, an partnership a tha tulh tulh emaw tih theih turin game an rawn thunun hneh hle a, harsa lo takin Siaha tan point an rawn thawkchhuak leh. Tie ah point inang an neih bakah a pumpui ah point 9 ve ve an nei ta bawk. Tie chak zawk zawnna leh Pool champion zawnna ni turin Siaha tan Mahajan a rawn pen chhuak a, Mission Veng tan Zarkima a rawn ding ve thung. Game hmahruai atangin Mahajan chu hmahruaitu niin Zarkima a che hlei thei lo. Game khelh chhunzawm zel niin Mahajan in game a thunun tluan thak a, straight game a chakna changin Siaha tan pool champion a rawn nihpui ta a ni. He Tie-a ah hian Siaha rawlthar Lalnunhlua chu Player of the Tie atan thlan a ni.

MBL III Semi Final hi khelh chhunzawm nghal tur a ni dawn a, Semi Final hmasa hi dt. 21.11.17 zan dar 8 ah Pool A champion Zotlang Rockets leh Pool B Runners Up Mission Veng ten an khel a nga, dt. 22.11.17 zan dar 8 ah Semi Final tho Southern Acers Siaha leh Tuikual Shuttlers ten an khel ve bawk ang.